A Schatz werda bleim

image_pdfimage_print

OLYMPUS DIGITAL CAMERASie werns scho gheard ham – da Brockhaus is tot. Na, ned da Herr Brockhaus, der scho länger. Sondern dem sei Lexikon. Bei vui unserer Leser werds im Regal steh. Wia a wertvoller Schatz. Vor zwoahundert Jahr is de erste Auflage erschienen. 1810 ! Und jez – aus und vorbei. Sie werns ahnen, des Internet is schuid. Imma eigentlich war da Brockhaus des Aushängeschuidl schlechthin füran gebildeten Bürger. Und scho d’Oma hod gsogt, do schlogst im Brockhaus nach und dann woaßtas. Nur jez klickt ma hoid auf Wikipedia. Des kennt da Maxi im Kindergarten – oda spätestens de Lisa in da ersten Klass Grundschui. Und sein’S ehrlich, wann ham Sie zuletzt an Brockhaus in da Hand ghabt – außa beim Staubwischen? Aba a Schatz werda bleim. Da Wert werd se steigern – und wenn’S moi koan Empfang ham und Sie wissen ned, wos des ‚propädeutische Seminar‘ vom Franzl is, dann huifta Eana. Ganz staad – a ohne Strom bei Kerzenlicht …                                       … moand d‘ Renate

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.